IPO: Алаяқтардан қалай сақтануға болады?

Егер сіз ІРО кезінде акцияларды сатып алғыңыз келсе, қор биржасына кіру мүмкіндігі бар арнайы делдал брокерге хабарласуыңыз керек. Сонымен қатар, сіз Tabys қосымшасына тікелей жазылу арқылы, сондай-ақ «Қазпошта» бөлімшелерінен акцияларды өзіңіз сатып ала аласыз.

Брокерлер қатаң түрде лицензия негізінде және қызмет көрсету түрлері туралы шарт жасалған жағдайда жұмыс істейді. Алаяқ брокерлерден қалай сақтануға болады?

Егер брокер сізге:

• қоңырау шалып, қысқа мерзімде 100% пайда табуға кепілдік берсе;
• акция сатып алудың тәуекелдерін ескертпесе;
• шарт жасасқанға дейін төлем жасауды талап етсе Сіз алаяққа тап болуыңыз мүмкін. Өйткені, нарықтағы нақты жағдайды ешкім алдын-ала болжай алмайтындығын есте сақтаңыз. Қор нарығында ақша табуға да, салымдарды жоғалтып алуға да болады.

Брокердің сенімді екеніне қалай көз жеткізуге болады?

• лицензиясын тексеру;
• кеңсесінің орналасқан жерін, телефон номерлерін анықтау;
• брокердің қаржылық көрсеткіштерін көру;
• акционерлер құрамын, реттеуші салған санкциялардың болуын зерттеу.

Брокер туралы ақпаратты www.aix.kz немесе www.kase.kz сондай-ақ, ҚР Қаржы нарығын реттеу және дамыту агенттігінің сайтынан тексеруге болады.

Дереккөз: Samruk-Kazyna official